Urdu News

Twitter icon
Facebook icon
Google icon
StumbleUpon icon
Reddit icon
Wed
18
Jan

وکی لیکس: صدر اوباما نے چیلسی میننگ کی سزا ختم کر دی

امریکی صدر براک اوباما نے اپنے دورِ صدارت ختم ہونے سے صرف تین روز قبل غداری کے الزام میں قید انٹیلی جنس کی ماہر خاتون چیلسی میننگ کی سزا ختم کر دی ہے۔
یاد رہے کہ چیلسی میننگ کو ان سفارتی مراسلوں اور میدان جنگ کی رپورٹوں کو افشا کرنے کا مرتکب پایا گیا تھا جو ’وکی لیکس‘ نے شائع کی تھیں۔ اس بنیاد پر سنہ 2013 میں انھیں غداری کا مرتکب قرار دیا گیا تھا اور انھیں 35 سال قید کی سزا سنائی گئی تھی۔
یاد رہے کہ 29 سالہ چیلسی میننگ جنس تبدیل کرانے سے پہلے بریڈلی میننگ نام کے مرد کی حیثیت سے فوج کے لیے خفیہ معلومات کا تجزیہ کرنے کی ماہر کے طور پر کام کرتیں تھیں۔
چیلسی میننگ کو سنہ 2013 میں 35 سال کی سزا ملی تھی جو کہ 17 مئی 2045 کو ختم ہونا تھی۔
وکی لیکس کے عنوان کے تحت سات لاکھ سے زائد دستاویزات اور وڈیوز افشا کر دی گئی تھیں جو کہ امریکی تاریخ میں خفیہ مواد کو منظر عام پر لانے کا سب سے بڑا واقعہ تھا۔
حالیہ کچھ دنوں میں وہائٹ ہاؤس نے اس بات کا اشارہ دیا تھا کہ وہ چیلسی میننگ کی سزا ختم کرنے پر غور کر رہا ہے۔

Wed
18
Jan

نائجیریا کی فضائیہ نے حادثاتی حملے میں درجنوں افراد ہلاک کر دیے

نائجیریا کی فضائیہ نے ملک کے شمال مشرقی علاقے رن میں حادثاتی طور پر حملہ کر کے کم از کم 52 عام شہریوں کو ہلاک اور متعدد کو زخمی کر دیا ہے۔
ہلاک ہونے والوں میں امدادی اداروں کے کارکن شامل ہیں، اور ریڈ کراس کا کہنا ہے کہ اس حملے میں اس کے عملے کے چھ افراد مارے گئے ہیں۔
نائجیریا کے صدر محمد بخاری نے اس جانی نقصان پر اپنے دکھ کا اظہار کرتے ہوئے لوگوں سے صبر کی درخواست کی ہے۔ ان کے ترجمان نے کہا کہ صدر بخاری کی انتظامیہ ریاست بونو کی حکومت کو اس 'افسوس ناک غلطی سے نمٹنے' میں مدد دے گی۔
بین الاقوامی امدادی ادارے میدساں ساں فرنتیئر کے مطابق 200 سے زیادہ لوگ زخمی ہوئے ہیں اور اس نے حکومت سے درخواست کی ہے کہ وہ زخمیوں کے انخلا میں مدد دے۔
میدساں ساں فرنتیئر کی ہنگامی سروس کے سربراہ ہیوگس رابرٹ نے کہا: ’50 سے زیادہ لوگ مارے گئے ہیں۔ ہماری ٹیم نے لاشیں گنی ہیں۔ بمباری سے ہونے والے دو دھماکوں میں دو سو سے زیادہ لوگ زخمی بھی ہوئے ہیں۔

Wed
18
Jan

آغا خان کے ساتھ چھٹیاں گزارنے پر جسٹن ٹُروڈو سے تحقیقات

کینیڈا کے وزیراعظم جسٹن ٹُروڈو کو ارب پتی اور روحانی رہنما آغا خان کے ذاتی رہائش گاہ پر چھٹی گزارنے پر تحقیقات کا سامنا ہے۔
جسٹن ٹُروڈو اور ان کی فیملی سال نو پر بہامس میں آغاز خان کی رہائش گاہ پر مہمان تھے۔
اب فیڈرل ایتھکس کمشنر اس بات کا جائزہ لیں گے کیا اس دورہ کی وجہ سے قوانین کی خلاف ورزی تو نہیں کی گئی۔
وزیراعظم جسٹن ٹُروڈو نے اس حوالے سے کہا کہ وہ کسی بھی قسم کے ’سوالات کے جوابات دینے پر خوش ہیں‘۔
گذشتہ ہفتے ابتدائی انکوائری کے بعد ایتھکس کمشنر میری ڈاسن نے کہا تھا کہ وہ باقاعدہ طور پر اس بات کی تحقیقات کریں گی کہ کیا مسٹر ٹُروڈو نے اخلاقی قوانین کی خلاف ورزی کی ہے۔
جب جسٹن ٹروڈو کی چھٹی کے بارے میں خبریں منظرِ عام پر آئیں تو انھوں نے اپنی ان چھٹیوں کی تمام معلومات فراہم کرنا شروع کر دیں۔
انھوں نے یہ بھی بتایا کہ اس دوران انھوں نے آغاز خان کا ذاتی ہیلی کاپٹر بھی استعمال کیا۔

Wed
18
Jan

استنبول نائٹ کلب کا حملہ آور 'گرفتار'

ترک میڈیا نے خبر دی ہے کہ رینا کلب میں حملہ کر کے متعدد افراد کو ہلاک کرنے والے حملہ آور کو گرفتار کر لیا گیا ہے۔
خیال کیا جا رہا ہے کہ عبدالقادر ماشاریپوف نے فائرنگ کی تھی جس کے نتیجے میں 39 افراد مارے گئے۔
اطلاعات کے مطابق انھیں استنبول کے ایسن یورت علاقے سے پکڑا گیا ہے۔
رائنا کلب کے حملے میں مقامی باشندوں کے علاوہ اسرائیل، فرانس، بیلجیئم تیونس، لبنان، انڈیا، اردن اور سعودی عرب کے شہری ہلاک یا زخمی ہوئے تھے۔
شدت پسند تنظیم دولتِ اسلامیہ نے دعویٰ کیا تھا کہ یہ حملہ اس نے کروایا ہے، اور کہا تھا کہ یہ ترکی کی شام میں فوجی مداخلت کے جواب میں کیا گیا ہے۔ 31 دسمبر اور یکم جنوری کی رات کو ایک حملہ آور ٹیکسی کے ذریعے کلب پہنچا اور گاڑی کی ڈکی سے لمبی نال والی بندوق نکال کر فائرنگ شروع کر دی۔

Wed
18
Jan

فلائٹ ایم ایچ 370: ملائشیا کے لاپتہ مسافر طیارے کی تلاش کا کام روک دیا گیا

تین سال قبل ملائشیا کے لاپتہ ہونے والے مسافر طیارے کی تلاش کا روک دیا گیا ہے، اس مسافر طیارے میں 239 افراد سوار تھے۔
آسٹریلیا، ملائشیا اور چین کی جانب سے جاری مشترکہ بیان میں کہا گیا ہے کہ بحر ہند میں ایک لاکھ 20 ہزار مربع کلومیٹر میں لاحاصل تلاش کے بعد یہ فیصلہ 'افسوس' کے ساتھ کیا گیا ہے۔
تاہم وہ پرامید ہیں کہ نئی معلومات سے مستقبل میں طیارے کے بارے علم ہوسکتا ہے۔
طیارے میں سوار مسافروں کے رشتے داروں نے یہ فیصلے کو 'غیرذمہ دارانہ' قرار دیتے ہوئے اس پر نظرثانی کرنے کا مطالبہ کیا ہے۔
سنہ 2014 میں ملائشین ایئرلائنز کا بوئنگ 777 جہاز بیجنگ سے کوالالمپور جاتے ہوئے لاپتہ ہوگیا تھا۔
تاحال صرف ایسے 20 ٹکڑے مل سکے ہیں جن کی شناخت لاپتہ طیارے کے ملبے کے طور پر کی گئی ہے یا قیاس ہے کہ وہ طیارے کا حصہ ہوسکتے ہیں۔
نومبر 2016 میں ایک رپورٹ میں کہا گیا ہے طیارہ ممکنہ طور پر 'بلند ہوا اور تیزی سے نیچے' بحرہند میں گر گیا۔

Wed
18
Jan

یمن میں جاری جنگ میں دس ہزار افراد ہلاک: اقوامِ متحدہ

اقوامِ متحدہ کے مطابق سعودی اتحادیوں اور حوثی باغیوں کے درمیان یمن میں جاری جنگ میں اب تک دس ہزار افراد ہلاک ہو چکے ہیں۔
اقوامِ متحدہ کی طرف سے کہا گیا ہے کہ اتنی بڑی تعداد میں ہلاکتیں یہ ظاہر کرتی ہیں کہ اس معاملے کو جلد از جلد ختم کرایا جائے جو کہ گذشتہ 21 مہینے سے جاری ہے۔
یہ بیان ایک ایسے وقت میں سامنے آیا ہے جب اقوامِ متحدہ کے نمائندے نے یمن کے صدر عبدالربہ منصور ہادی سے دارالحکومت عدن میں ملاقات کی۔
یہ لڑائی مارچ 2015 میں شروع ہوئی تھی جب سعودی فوج نے یمن کی منتخب کردہ حکومت کے خلاف بغاوت کو روکنے کے لیے ملک میں دخل اندازی کی تھی۔

Wed
18
Jan

چاند پر قدم رکھنے والا آخری انسان چل بسا

چاند پر قدم رکھنے والے آخری انسان جین سرنن 82 برس کی عمر میں چل بسے ہیں۔
امریکی خلائی ادارے ناسا نے کہا ہے کہ انھیں سرنن کے انتقال پر گہرا دکھ ہوا ہے۔
کیپٹن سرنن کا شمار ان تین افراد میں ہوتا ہے جو دو بار چاند پر گئے۔ پہلی بار وہ 1969 میں وہ اپالو 10 مشن کا حصہ تھے جس نے چاند کی سطح سے 50 ہزار فٹ اوپر پرواز کی، تاہم وہ اترا نہیں۔
اس کے تین سال بعد سرنن اپالو 17 مشن کے کمانڈر کی حیثیت سے نہ صرف چاند پر اترے بلکہ انھوں نے وہاں تین دن گزارے۔
ان کے بعد سے آج تک کوئی اور انسان چاند پر نہیں گیا۔
چاند سے لوٹتے وقت انھوں نے کہا تھا: 'ہم جیسے آئے تھے ویسے ہی واپس جا رہے ہیں۔ اگر خدا نے چاہا تو تو ہم تمام انسانیت کے لیے امن اور امید لے کر لوٹیں گے۔'

Wed
18
Jan

ہمیں ٹرمپ کے مشوروں کی ضرورت نہیں: فرانسیسی صدر

فرانسیسی صدر فرانسوا اولاند نے جرمنی کی فراخ دلانہ پالیسی پر نومنتخب امریکی صدر ڈونلڈ ٹرمپ کی کڑی نکتہ چینی کو رد کر دیا ہے۔
انھوں نے کہا: 'یورپ کو کیا کرنا چاہیے اور کیا نہیں، اس کے لیے اسے کسی بیرونی مشورے کی ضرورت نہیں ہے۔'
ٹرمپ نے جرمن چانسلر انگلیلا میرکل کے بارے میں کہا تھا کہ انھوں نے بڑے پیمانے پر نقل مکانی کی اجازت دے کر 'تباہ کن غلطی' کی ہے۔
اولاند نے امریکی ٹیلی ویژن سی این این کو انٹرویو دیتے ہوئے کہا: 'میرے خیال سے کسی امریکی نومنتخب صدر کا دوسرے ملکوں کی سیاست میں اس طرح کھلم کھلا دخل دینا نامناسب ہے۔

Sat
14
Jan

ٹرمپ ’روس اور چین کے ساتھ مل کر کام کرنے کے خواہاں'

امریکہ کے نو منتخب صدر ڈونلڈ ٹرمپ نے کہا ہے کہ وہ روس اور چین کے ساتھ مل کر کام کرنے کے خواہش مند ہیں بشرطیکہ دونوں ممالک تعاون کریں۔
ٹرمپ نے وال سٹریٹ جرنل سے بات کرتے ہوئے کہا کہ روس پر عائد حالیہ پابندیاں کچھ عرصے تک قائم رہیں گی لیکن پھر انھیں اٹھایا جا سکتا ہے۔
انھوں نے ون چائنا پالیسی کے متعلق کہا کہ اس بارے میں بات چیت ہو سکتی ہے۔ فی الحال اس پالیسی کے تحت امریکہ تائیوان کو چین سے علیحدہ تسلیم نہیں کرتا۔
اپنے انٹرویو میں ڈونلڈ ٹرمپ نے کہا کہ اگر ماسکو اسلامی شدت پسندی کے خلاف جنگ اور دوسرے معاملوں میں واشنگٹن کی مدد کرتا ہے تو روس پر سے پابندیاں ہٹائی جا سکتی ہیں۔

Sat
14
Jan

ایف بی آئی تحقیقات: ٹرمپ ہلیری پر برس پڑے

امریکہ کے نو منتخب صدر ڈونلڈ ٹرمپ نے انتخاب کے دوران ایف بی آئی کی کارروائی کے خلاف تحقیقات شروع ہونے پر آگ کا رخ شکست کھانے والی حریف ہلیری کلنٹن کی جانب موڑ دیا ہے۔
امریکہ کے تحقیقاتی ادارے ایف بی آئی اور محکمہ انصاف کو ہلیری کلنٹن کے ذاتی ای میل سرور کے حوالے سے سوالات کا سامنا ہے۔
ایف بی آئی کے ڈائریکٹر جیمز کومے کی جانب سے انتخاب سے 11 روز قبل تحقیقات دوبارہ شروع کرنے کے فیصلے نے انتخابی دوڑ میں خلل ڈال دیا تھا۔
ڈونلڈ ٹرمپ نے ٹویٹ کی ہے کہ ’مسز کلنٹن جہنم جیسی قصوروار ہیں۔‘
نو منتخب امریکی صدر ڈونلڈ ٹرمپ اقتدار سنبھالنے سے صرف ایک ہفتے قبل ہی مختلف موضوعات پر ٹویٹس کر رہے ہیں۔

Sat
14
Jan

پارک لین کے فلیٹس کب خریدے گئے، کب بِکے

پاناما لیکس میں سامنے آنے والی دو آف شور کمپنیوں، نیلسن اور نیسکول نے لندن کے مہنگے ترین علاقے میے فیئر میں پاکستان کے وزیر اعظم نواز شریف کی فیملی کے زیر تصرف فلیٹس انیس سو نوے کی دہائی میں خریدے تھے اور اس کے بعد سے اب تک ان کی ملکیت میں کوئی تبدیلی نہیں آئی ہے۔
بی بی سی اردو کو حاصل شدہ سرکاری دستاویزات کے مطابق انیس سو نوے کی دہائی سے یہ چار فلیٹس نیسکول اور نیلسن کے نام پر ہی ہیں اور ان دونوں کمپنیوں کی ملکیت کا اعتراف وزیر اعظم نواز شریف کے صاحبزادے حسین نواز کر چکے ہیں۔
پاناما پیپرز میں نیلسن اور نیسکول کمپنیوں کی ملکیت کے بارے میں انکشاف کے بعد سے پاکستان میں حکمران جماعت کے سربراہ وزیر اعظم نواز شریف اور ان کے خاندان کو کرپشن کے الزامات کا سامنا ہے اور انہی انکشافات کی بنیاد پر حزب اختلاف کی جماعتوں پاکستان تحریک انصاف، جماعتِ اسلامی اور عوامی مسلم لیگ کی درخواستیں سپریم کورٹ آف پاکستان میں زیرِ سماعت ہیں۔

Sat
14
Jan

امریکہ میں بغیر ویزا رہائش کی پالیسی ختم، کیوبا کا خیرمقدم

کیوبا کی حکومت نے امریکی صدر براک اوباما کے اس فیصلے کا خیر مقدم کیا ہے جس میں انھوں نے کیوبا کے شہریوں کو امریکہ پہنچنے پر ویزا کے بغیر ملک میں رہنے کی اجازت ختم کر دی ہے۔
کیوبن حکومت کے مطابق اس فیصلے کی وجہ سے ملک میں ’برین ڈرین‘ ہو رہا تھا اور ہزاروں کی تعداد میں کیوبا کے شہری اپنی جانوں کو خطرے میں ڈال کر امریکہ جانے کی کوششیں کرتے تھے۔ ہوانا میں حکومت نے کہا کہ اس پالیسی کو ختم کرنے سے دونوں ملکوں کے روابط کو اور تقویت ملے گی۔
کیوبا کی سفیر برائے امریکی معاملات جوزفینا ودال نے کہا کہ: ’لوگوں کی منتقلی سے نہ صرف کیوبا کی اپنی بلکہ امریکہ کی بھی سیکورٹی متاثر ہو رہی تھی۔ ان امتیازی قوانین کی وجہ سے انسانی سمگلنگ، فراڈ اور تشدد پر مبنی جرائم مرتکب ہو رہے تھے۔‘
صدر براک اوباما نے اپنے بیان میں کہا: ’فوری نفاذ کے ساتھ، کوئی بھی کیوبا کا شہری اگر امریکہ میں غیر قانونی طریقے سے داخل ہوتا ہے تو اگر وہ انسانی حقوق کے تحت مدد کا حقدار نہیں بنتا تو اس کو امریکی داخلہ قوانین کے مطابق ملک سے دربدر کر دیا جائے گا۔'

Sat
14
Jan

بھاگتے تارکین وطن کو گرانے والی کیمرا خاتون کو سزا

ہنگری کی پیٹرا لیزلو کو ستمبر 2015 میں تارکین وطن کو لات مارنے اور گرانے پر عدالت نے تین سال تک اچھے چال چلن برتنے کے آزمائشی دورانیے کی سزا سنائی ہے۔
دو سال قبل پیٹرا لیزلو کی ویڈیو بنائی گئی تھی جس میں وہ ہنگری اور سربیا کی سرحد پر بھاگتے ہوئے تارکین وطن کو لات مارتے ہوئے اور ان کو گراتے ہوئے دیکھا گیا تھا۔ ان تارکین وطن میں ایک کم عمر بچی بھی تھی اور ایک مرد جس کی گود میں ایک نومولود بچہ بھی تھا۔
پیٹرا لیزلو نے کہا ہے کہ وہ اس فیصلے کے خلاف اپیل کریں گی۔
جج الیس نناسی نے فیصلہ سناتے ہوئے کہا کہ پیٹرا لیزلو کا رویہ سماجی اخلاقیات کے خلاف تھا اور وکیل دفاع کے دلائل کو مسترد کر دیا جس میں کہا گیا تھا کہ پیٹرا لیزلو صرف اپنے آپ کو بچا رہی تھیں۔

Sat
14
Jan

ال سلواڈور: 24 گھنٹوں میں قتل کا کوئی واقعہ نہیں ہوا

لاطینی امریکی ملک ال سلواڈور میں پولیس حکام کا کہنا ہے کہ گذشتہ 24 گھنٹوں میں قتل کا کوئی واقعہ پیش نہیں آیا ہے، یہ ایک غیر معمولی بات ہے کیونکہ ملک میں جرائم پیشہ گروپوں کے درمیان گينگ وار کے سبب قتل اور غارت گری ایک عام بات ہے۔
اقوام متحدہ کے اعداد و شمار کے مطابق ال سلواڈور میں قتل کی اموات کی شرح پوری دنیا میں سب سے زیادہ ہے۔
اس برس کے اعداد و شمار کے مطابق ال سلواڈور میں اب تک یومیہ قتل کے 10 واقعات پیش آتے رہے ہیں لیکن بدھ ایک ایسا دن تھا جب غیر متوقع طور پر قتل کا کوئی بھی واقعہ پیش نہیں آیا۔
تشدد کے اس طرح کی بیشتر واردات جرائم پیشہ گروہوں کی جانب سے انجام دی جاتی ہیں، جنھیں مقامی سطح پر ماراس کے نام سے جانا جاتا ہے۔ اس طرح کے کئی جرائم پیشہ گروہ لاطینی امریکہ کے مرکزی علاقوں میں پھیلے ہوئے ہیں۔
پولیس نے تشدد میں کمی کی کوئی خاص وجہ نہیں بتائی ہے لیکن حکام نے گینگ کے دو گروہوں کے درمیان متنازع جنگ بندی بحال کروانے کی بھی تردید کی ہے۔

Sat
14
Jan

شام کے فوجی اڈے پر ’اسرائیلی بمباری‘

شام نے اسرائیل ہر دمشق کے مغرب میں فوجی ہوائی اڈے پر بمباری کا الزام لگایا ہے۔
شام کے سرکاری ٹی وی چینل کے مطابق شامی فوج کا کہنا ہے کہنا ہے کہ مزۃ کے ہوائی اڈے پر کئی راکٹ گرے ہیں جس کے باعث آگ لگ گئی ہے۔
تاہم یہ واضح نہیں ہے کہ اس بمباری کے نتیجے میں کوئی جانی نقصان ہوا ہے۔
یاد رہے کہ ماضی میں بھی اسرائیل نے نہ تو شام میں فوجی کارروائی کی کبھی تصدیق کی ہے اور نہ ہی تردید۔
اندیشہ ظاہر کیا جاتا رہا ہے کہ اسرائیل نے شام میں 2011 میں شروع ہونے والی خانہ جنگی کے بعد کئی بار اس اسلحے کو نشانہ بنایا ہے جو حزب اللہ کے لیے روانہ کیا جانے والا تھا۔
شامی کی سرکاری خبر رساں ایجنسی کے مطابق مزۃ کے فوجی اڈے میں دھماکے ہوئے ہیں اور ایمبولینس اڈے کی جانب روانہ کر دی گئی ہیں۔

Pages

Subscribe to RSS - Urdu News